II YLMY-USULY MASLAHAT
Maýa Kulyýewa adyndaky Türkmen milli konserwatoriýasynda “Berkarar döwletiň täze eýýamynyň Galkynyşy döwründe Türkmenistanda saz biliminiň we ýerine ýetirijilik sungatynyň wajyp meseleleri” atly II ylmy-usuly maslahat geçirildi. Maslahatyň umumy mejlisini Maýa Kulyýewa adyndaky Türkmen milli konserwatoriýasynyň rektory, sungaty öwreniş ylymlarynyň kandidaty R.H.Amangeldiýew alyp bardy. Mejlisde “Türkmen wokal sungatyny millileşdirmegiň esaslary” diýen temasy bilen Türkmenistanyň hormatly il ýaşulusy, Maýa Kulyýewa adyndaky Türkmen milli konserwatoriýasynyň “Ýekelikde aýdym aýtmak” kafedrasynyň professory, Türkmenistanyň halk artisti Atageldi Garýagdyýew çykyş etdi. Soňra “Türkmen halk aýdym saz sungaty we olary öwrenmegiň ähmiýeti” atly temasy bilen Türkmen milli konserwatoriýasynyň “Türkmen sazy” kafedrasynyň uly mugallymy, Sungat ylymlarynyň doktory, Türkmenistanyň at gazanan artisti Çaryýar Jumaýew gyzykly gürrüňler berdi. Mejlisde indiki söz nobaty Maýa Kulyýewa adyndaky Türkmen milli konserwatoriýasynyň “Kompozisiýa we gurallama” kafedrasynyň uly mugallymy Meret Annamyradowe berildi. Ol “Ýaş kompozitorlaryň döredijilik ukyplaryny ösdürmekde ýörite hünär dersleriniň ähmiýeti” barada çykyş etdi. Ylmy-usuly maslahatyň umumy mejlisiniň dowamynda, Maýa Kulyýewa adyndaky Türkmen milli konserwatoriýasynyň ýanyndaky D.Öwezow adyndaky ýörite sazçylyk mekdebiniň direktory Merdan Kerimow “Okuw işinde mugallymyň resminamalary we ýöredilişi” boýunça sungat işgärleriniň wezipeleri barada maslahata gatnaşyjylaryň dykgatyna ýetirdi. Umumy mejlisiň ahyrynda Türkmen milli konserwatoriýasynyň “Bagşyçylyk sungaty” kafedrasynyň uly mugallymy Kerwen Ýowbasarow “Türkmen halk dessanlaryny ylmy esasda öwrenmek” atly temasy bilen çykyş etdi.
Bu ylmy maslahat üç bölümçeden ybarat bolup, birinji bölümçe “Saz nazaryýet derslerini okatmagyň usulyýeti: teoriýa we tejribe”, ikinji bölümçe “Halk saz ýerine ýetirijiliginiň usulyýeti: teoriýa we tejribe”, üçünji bölümçe bolsa, “Ýerine ýetirijilik sungatynyň taryhy we nazaryýeti. Ýerine ýetirijilik sungatynda interpretasiýa meseleleri” boýunça boldy. Her bölümçede Türkmen milli konserwatoriýasynyň halypa mugallymlary, welaýatlardan gelen mugallymlar peýdaly maslahatlary bilen, çagalarda saz bilimini, şeýle hem höweslerini artdyrmak maksady bilen gyzyklanma döredýändiklerini belläp geçdiler.
Ylmy-usuly maslahatyň birinji bölümçesinde “Saz-nazaryýet derslerinde skaffold kartoçkalarynyň ulanylyşy” atly temasy bilen Sahy Jepbarow adyndaky Arkadag şäher ýörite sungat mekdebiniň “Sazyň taryhy we nazaryýeti” bölüminiň mugallymy Annabegi Emirgulyýewa çykyş etdi. Maslahatyň ahyrynda çykyş eden ähli mugallymlara minnetdarlyk sözleri aýdylyp, hormat haty gowşuryldy.
“Sazyň taryhy we nazaryýeti” bölüminiň mugallymy
Annabegi EMIRGULYÝEWA
